限制公交停站并无实际意义

liuzhuo

来自大洋网：http://informationtimes.dayoo.co ... /content_748502.htm

◎李月婷 编辑

睇广州嘅公交站牌，无论本地人定系外地人都会感叹：广州公交真系发达，同一个站点都有十几二十条线路车，而且同一个站名仲有几个分站，真系睇到人眼花花。

　　因为线路太多，公交站前经常会出现长蛇阵，搞到条路大塞车。可能就系因为咁样，下个月开始实施嘅公交客运管理条例作出规定：同一个公交站点停靠嘅线路唔可以超过12条。咁就意味住，依家超过12条线路停靠嘅站点统统都要调整。

　　咁样做到底有冇效果，就见仁见智了。试问，依家嘅公交站有几多个符合“12条线路”嘅规定呢？喺唔改变现有线路嘅情况下去调整，无非就系多开几个分站抽疏线路。好似岗顶站咁，可能要开到4号站5号站先算勉强“合格”。分站一开，啲街坊可能变咗盲头乌蝇，揾站揾到一头烟。不过，我觉得咁样调整只系治标不治本。有街坊就曾经提出，有啲地方集中咗太多线路，无论点样调整站点都冇用，车多嘅时候照样塞车。而且唔少地方头尾两个分站隔到百几两百米咁远，要喺同一个站点转车嘅话会好唔方便。

　　全市公交线路调整已经搞咗好多次，次次提“优化”但系唔知有几多线路得到优化。限制一个公交站点嘅停靠线路只系机械式调整。建议有关部门认真摸查一下，乜嘢线路同站点人气最旺要多开，又有乜嘢线路设计唔合理可以改下行程。